حوار عن مدونتى أمل الحياة بموقع البوسطجى ..

مدونة : أمل الحياة حــوار ( ابتــسام مُصطفى ) 

مدونة تبنض بالحياة ، أسمها يعطيك دفعـه من الأمل ، وهي لصاحبتها مدربة التنمية البشرية - أمل زكي -
ولنتعرف عليها أكثر وعلى آخر إنجازاتها أجرينا معها هذا الحــوار ..

1* المدربة أمل زكي ، بالنسبة لعالم التدوين وهوعالم كبير جداً ، ماهو السبب الحقيقي وراء عمل مدونتك ؟ هل هي طريقة للتواصل ونشر أفكارك أم لأسباب أخرى ؟

- في الحقيقة أنا بحب الكتابه جداً ، وفي موضوعات كتيرة بكتبها لأني بكون حساها وبكون عارفه تأثير أي حاجة بنكتبها بإحساس قد إيه بتوصل للناس ، وبدأت بعمل جروب وصفحة ، وبعد كده جت فكرة المدونة من كاتبة صديقة ، وهي اللي شجعتني على إني أعملها ...

2*بمناسبة حبك للكتابه ،هل فكرتي في يوم بتأليف كتاب خاص بالتنمية البشرية ؟ خصوصاً إنه يعتبر المجال الذي حصلتي فيه على شهادات معتمده كثيره ؟

-بصراحه الفكرة فى دماغى جداً ويمكن أنفذها الفترة الجاية، لكـن مش دلوقتي ، بحيث إني أكون جمعت كُل الصورة اللي أنا شيفاها وأقدر أعملها بشكل جديد ومختلف ..

3*في مجال التنمية البشرية رموز كثيرة وأبرزها دكتور إبراهيم الفقي - رحمه الله ، هل هو كان سبب إتجاهك لمجال التنمية البشرية ، ولا حُباً في أن  يكون لكِ دور مهم في المجتمع وخصوصاً إن المجال له تأثير بشكل كبير على كل فئات الشباب تحديداً ..؟

-قبل ما أدخل مجال التنمية البشرية كنت بتابع الدكتور إبراهيم الفقي ، وكنت بحس وقتها إنه بيقول أفكار لو فعلاً ركزنا فيها وعملناها كل الدُنيا حوالينا هتتغير ،  وبطبعي بحب القراءة جداً ، فكانت الأفكار قريبة مني وحبيت أفيد الناس وانقل العلم ده ، بس افيد نفسي الأول واعرف اكتر في العلم ، وبدأت وقتها وأخدت كورسات وكان من أوائل الكورسات دي  كورس لدكتور إبراهيم الفقي – رحمه الله ..

4* بالنسـبة لـمجال دراستك كان متعلق بكونك خريجة كلية الآداب قسم الصوتيات 
واللسانيات وأيضاُ كونك محاضرة ومعالجة لإضطرابات اللغة في أكثر من مكان هل فكرتي في تبني حملة خاصه بهذا الموضوع في مصر ؟

-فعلاً مجال دراستي متقارب مع بعض أفكار التنمية البشرية ، مـن التواصل ولغة الجسد وتعبيرات الوجه والتربية وأساسها عند الأطفال ، والفكـرة دي موجوة دايماً في بالي ، لكنها محتاجة مجهود أكـبر مني وتتعمل بشكل منظم ومحتاجة مجهود مع  إشتراك كذا مؤسسه علشان نقدر ننفذها بالشكل الأمثل ..

5*بما إن الفكرة قائمة  هل مفكرتيش تنفذيها حتى إلكترونياً من خلال مدونتك ، أو صفحتك ؟؟

- عندى جروب فعلياً خاص بالاطفال والعلاج .. دايماً بنزل عليه معلومات خاصة بالتخاطب وعلاج اضطرابات الكلام واللغة وكيفية تجنب كل ده ممكن ،أو حتى الام والاهل ينتبهوله من اوله..

6*أمل زكي كمدربة للتنمية البشرية ، شايفه مستقبل التنمية البشرية في مصر إزاي بعد مرور مصر بفتره عصيبه جداً ؟

شايفة الفترة دى المجال دخل فيه ناس غير أُهل لنقل العلم ..
شايفة أنه بعض الناس متصورين إنه الموضوع حاجة مادية بس وبصينلها بفكرة مكسب وربح .. 

وشايفة كمان أن كثير من المدربين للأسف الشديد بيعلموا الناس علم هما نفسهم مش بيعملوا بيه واحنا عارفين انه 

كبر مقتاً عند الله أن تقولوا ما لا تفعلون .. 

ولكن أنا متفائلة خير إنه كل ده ينتهى قريباً .. وأى حد غير اهل لتعليم الناس ونشر رسالة .. مش هيستمر  كثير

وهيبقى على الساحة الناس اللى ربنا اهلهم وأعدهم لنشر العلم بأمانة

7*أمل زكي الإنسانه لو اتفرجتي على مقابلاتك ومحاضراتك كناقده لأمل زكي المدربة تقولي إيه ؟؟

- بدعى ربنا انى استمر واتحسن اكثر واكثر فى طريقتى واسلوبى 
يمكن بحب فيه البساطة جداا .. 
ودايما شايفة نفسى محتاجة بإستمرار اقرأ وادرس وأزود علمى عشان اكون أهل جداً لنقله للناس بالشكل الامثل ..

8*لو طُلب منك توجهي رساله للشباب، ، تنصحيهم بإيه ؟

- انصحهم إنهم يركزوا على نفسهم .. ويبقى دايمًا عندهم تحفيز ذاتى ما ينتظهروش ده من الآخرين ويركزوا فى رسالة حياتهم وهدفهم عشان يوصلوا له ويبعدوا عن نقد الناس والتركيز معاهم أو التقليد الأعمى للآخرين 
عشان كل واحد يكون ليه بصمة متميزة فى المجتمع مــيكونش زى ما عاش زى ما مات

9*لكل اللي حابين يتواصلوا معاكي للإستفاده من خبراتك يقدروا يتواصلوا إزاي ؟

- اسهل طريقة للتواصل معايا هى صحفتى الرسمية على الفيس بوك عن طريق الرسايل الخاصة  
http://www.facebook.com/coachamlzaki

9*ختاماً رمضـآن كريم وتقولي  إيه لموقع البوسطجي في إطلالته الجديده ؟
- أقول  كل سنة وأنتم طيبين واشكر كل العاملين  على نجاح الموقع ~

إن شاء الله يكون ليكم دائما  بصمة متميزة وتأثير فى حياة الآخرين ..

لينك الموضوع الأصلى :

http://elpostagy.com/more.php?id=1634&mi_id=308