السبت، 8 ديسمبر 2012

ارتقــــــــــوا بالمفاهيم الدينية وكونوا واعيــن بها رحمكم الله :)



بقالى فترة ملاحظة تعقيبات على امور كثيرة بطريقة غريبة جداا !!

مش عندى ليها معنى إلا جهل وقلة وعى بالدين ومفاهيمه اللى ربنا وضعها لنا ..


* بعض الناس جعلت نفسها حاكم على الناس التانية مع إن ربنا قال فى كتابه العزيز

 إِنِ الْحُكْمُ إِلَّا لِلَّهِ

وتخيلت إنها أحسن من غيرها بسبب عبادة ظاهرية تقع فى مكان العلاقة بين العبد وربه فقط وليس البشر

وتناسوا العلاقة بين الناس وبعضها التى تعتمد على الاخلاق والمعاملة الإسلامية قبل المظهر والملبس والعبادات الظاهرية


اللى فاهم إن الإسلام " صلاة وصيام وحجاب بس " يبقى جاهل بدينه ومحتاج يفهم الدين كاملاً

واللى فاهم إن الإسلام تعامل بخلق بس من غير حقوق الله الصلاة والصيام والفروض " يبقى ناقصه خطوات لربنا مهمة اوى " وندعيله بالهداية ..

الإسلام الإثنين مع بعض عبادة ومعاملة .. بس مش معنى كده إننا نحكم على الناس باالمظهر


إنما الأعمال بالخواتيم

قال صلى الله عليه وسلم : إن العبد ليعمل عمل أهل النار وإنه من أهل الجنة، ويعمل عمل أهل الجنة وإنه من أهل النار  وفي رواية للإمام أحمد في المسند : وإنما الأعمال بالخواتيم.

لعل العاصى يتوب قبل موته ويدخل بتوبته الفردوس الأعلى

ولعل متدين يموت على معصية يدخل بها الدرك الأسفل من النار


وأصدق مثال فى القرآن الكريم قصة الراهب اللى سجد للشيطان فى خاتمة حياته مع إنه كان راهب وعابد وزاهد فى الدنيا ....

"كَمَثَلِ الشَّيْطَانِ إِذْ قَالَ لِلْإِنْسَانِ اكْفُرْ فَلَمَّا كَفَرَ قَالَ إِنِّي بَرِيءٌ مِنْكَ إِنِّي أَخَافُ اللَّهَ رَبَّ الْعَالَمِينَ * فَكَانَ عَاقِبَتَهُمَا أَنَّهُمَا فِي النَّارِ خَالِدَيْنِ فِيهَا وَذَلِكَ جَزَاءُ الظَّالِمِينَ [الحشر:16-17] "


ارتقـــــــــــــــــــــــوا بالمفاهيم الدينية وكونوا واعيــن بها رحمكم الله :)

لا تكونوا سبب فى بعد الناس عن طريق الله بأسلوب مقزز للقلب والروح
منفر لا مُقرب لله :)

هكذا علمنا ديننا الحنيف ~
<3
فَبِمَا رَحْمَةٍ مِنَ اللَّهِ لِنْتَ لَهُمْ وَلَوْ كُنْتَ فَظًّا غَلِيظَ الْقَلْبِ لانْفَضُّوا مِنْ حَوْلِكَ فَاعْفُ عَنْهُمْ وَاسْتَغْفِرْ لَهُمْ وَشَاوِرْهُمْ فِي الأَمْرِ فَإِذَا عَزَمْتَ فَتَوَكَّلْ عَلَى اللَّهِ إِنَّ اللَّهَ يُحِبُّ الْمُتَوَكِّلِينَ

لـــ أمل زكى

 <3

الاثنين، 3 ديسمبر 2012

الأم








الأم ♥ حنان مالوووووش حدود ...

تبقى مبسوط تبقى طايرة عشانك ..


تنكسر وتزعل تبقى زعلانة ليك أكثر منك ..

تبكى تلاقى دموعها سابقة دموعك وأول اللى يطبطب عليك ...

وحتى لما تزعلها فى يوم ... من قلبها بتدعيلك ♥

لــ أمل زكى ~

الخميس، 18 أكتوبر 2012

للصداقة عناوين

 
فى أصحاب نعرفهم من فترة قصيرة .. بس بقوا ليهم مكان فى القلب ما يتمحيش :)

وفى أصحاب نعرفهم من سنين .. حتة من روحنا وقلبنا .. مهما انشغلنا عنهم مكانتهم بتكبر مع الوقت والمواقف الجميلة .. ♥ ♥


وفى أصحاب قضينا معاهم سنين .. بس علاقتنا بيهم اتغيرت ويمكن تكون اتمحت .. كانوا أصحاب وقت فقط .. والحياة شغلتهم وشغلتنا عنهم والمكانة اللى فى قلوبنا ليهم يـــــــــاه اتغيرت ;)

وفى أصحاب من الطفولة .. بينا وبينهم شقاوة وبراءة وحياة تجنن عمرها ما اتغيرت ;;)

وفى أصحاب مصلحة .. يعرفوك ويكلموك بس .. لما يحتاجوا لمصلحة ودول معروووووفين فى الحياة ولازم يكونوا موجودين .. عشان نعرف قيمة ناس تانية كثيــــــــــــر ..

وفى ناس تعمل صحابك وهما بيكرهوك .. وبيغيروا منك وبيحقدوا عليك .. بس دول سهل اوى اوى نعرفهم عشان عينهم بتقول حاجة وشفايفهم بتنطق بحاجة تانية خالـــــــــص ..


كلنا عندنا النوعيات دى فى حياتنا .. وأنا أولكم :)

والحقيقة إننا لازم نتعامل مع كل الأنواع دى ..

عيش واتعامل مع كل الأصناف

عشان لما تحس بالإيجابى فى علاقتك بالأصدقاء حتعيش السعادة

أما النوع السلبى حيعرفك بقيمة الصديق الحقيقى ♥

للــ مدربة أمل زكى

السبت، 1 سبتمبر 2012

علشان تكون عايش بجد





اليوم من غير روحانيات مش بيكون له طعم ..

ومن غير إجتماعيات لطيفة بيبقى يوم طويـــــــــل ..

ومن غير حب بيبقى يوم ثقيل ..

ومن غير شغل بيكون يوم ممل .. 

ومن غير ما تطور نفسك بيبقى كأنه يوم ماجاش .. 

وعشان كده حافظ على ( علاقتك بربك وأهلك وحبايبك وشغلك وتنمية نفسك) 

عشان تحس إنك عايش بجد 

لـــ أمل ذكى 

الأربعاء، 15 أغسطس 2012

فكر فى النعم .. ترتاح :)

 
 
مشكلة الناس انهم بيفكروا فى ايه ناقصهم .. مش فى النعم اللى ربنا ميدهالهم ~
 
الحمد لله ع الإسلام
الحمد لله ع العيلة
الحمد لله ع الزوج الصالح
الحمد لله ع الصحبة الصالحة
الحمد لله ع الحجاب
الحمد لله ع النفس اللى المستيقظة <3
الحمد لله ع الحاقدين والحاسدين " ده نجاح "
الحمد لله ع الستـــــــر
الحمد لله ع الصحة
الحمد لله ع الصدقــــات
الحمد لله ع راحة البال
الحمد لله ع الابتلاء " منحة فى كل ابتلاء "
والحمد لله على نعمة تأمل نعم الله
.. كل واحد لو فكر ف النعم اللى عنده ... حيلاقى انه كلمة الحمد لله قليلة ع نعم ربنا
" وَإِنْ تَعُدُّوا نِعْمَةَ اللَّهِ لاَ تُحْصُوهَا "
 
لـــ أمل ذكى

الأربعاء، 11 يوليو 2012

لازم من دلوقتى نستعد لرمضان ~




لازم من دلوقتى نستعد لرمضان




ونستغل كل منح ربنا لينا فى الأيام المباركة دى ~




وبما إن للصائم عنده فطره دعوة لا ترد ♥




حضر من دلوقتى واكتب كل الامنيات والدعوات اللى نفسك فيها فى ورق ..


وكن على يقين من اجابة ربنا لدعواتك ~




عندك 30 دعوة لا تـــــــــــــــــــــــــــــــرد .. كل يوم ادعى بدعوة اليوم .. حيخلص رمضان واغلب دعواتك اتحققت .. وحسيت بتغير فى حياتك اوووى ♥ :)




اصل فرص ربنا لينا فى رمضان كثيـــــــــــــرة وعظيمة فى ثوابهـــا ..


الصح .. نقتنصها :) ;) 





                                                         للـــ مدربة أمل ذكى ~

أحنا اللى لازم نقرر ايه اللى يحصل لنا


لكل أنثى فكرة نفسها ضعيفة ^^

او بتقول على حاجات كثيرة فى حياتها ( مش حقدر ) !!

فاكرين جملة ( بنت ب 100 راجل ) ~~

كثير سمعناها .. ويمكن مش كلنا اتحطينا فى موقف انه يبان الراجل اللى جوانا او ال 100 راجل دول ^^

بس صدقونى وقت ما حتتحطى فى موقف صعب

قدامك حاجة من الاثنين !!

يا تبقى ب 100 راجل وقوية وتعدى منه اقوووى مليون مرة من الاول .. وتعرفى انك اقوى من ذكور كثير افتقدوا فى زمانا ده للرجولة ^^

يا تختارى انك تعيشى ضعيفة ومنكسرة وتندمى بقى ع اللى راح واللى حيروح من حياتك ونجاحك وقوتك ..

مش بنختار الموقف اللى بنتحط فيه اه

بس أحنا اللى لازم نقرر ايه اللى بيحصل لينا 

للــ مدربة أمل زكى 

الخميس، 14 يونيو 2012

من يحبك حقا لن يقبل إلا بأن يكون لك



من يحبك حقا لن يقبل إلا بأن يكون لك

كام واحد هنا كان نفسه يكون مع إنسانة بعينها ... وماكنش ~~ بسببها ~

وكام إنثى كان نفسها تكون مع راجل معين .. وماكنتش .. عشان هو عاوز كده ~~

ما تسمحش لحد يلعب بيك عشان إنت اكبر من كده ..

وما تسمحش لحد يخليك فى حياته وقت ما يحب ويبعد عنك وقت ما يحب ..

عشان وقتها حتنزل إنت نفسك من نظر نفسك قدام نفسك ..


طبيعى جداا نحط اعذار للناس فى حياتنا .. وكل ما كانوا اقرب لينا بنعذرهم أكثر ..

بس نعمل ده من غير ما نخلى حد يستغل عواطفنا ومشاعرنا .. ويضحك علينا كما يشاء وفى الاخر نقول اننا مظلومين ونعيش ونعيش فى دور الضحية !!
ونقول إن الانسان او الانسانة دول ظلمونا ..

قال تعالى :

( فَمَا كَانَ اللهُ لِيَظْلِمَهُمْ وَلَـكِن كَانُواْ أَنفُسَهُمْ يَظْلِمُونَ ) التوبة : 70

عشان وقتها حتكون إنت رضيت بظلم نفسك فكان طبيعى إنه يوقع عليك الظلم من الناس ..!



اللى بيحبك بجد .. حيصونك .. ومش حيعمل غير الصح عشان يكون معاك .. ومهما كان عنده ظروف ومشاكل وتقلبات .. حتلاقيه بيعديها عشان مؤمن بيك وبوجوده وياك ...


ما هو الحب مالوش غير طريق واحد منور قدام كل الدنيا والناس .. ♥

ومهما كانت ظروف الانسان او الانسانة دول .. حتلاقيهم فى مشوار حياتكم .. بيعملوا خطوات وكل يوم بيعدى بيثبتوا الحب ده بالأفعال مش بالكلام السهل !! اللى مفيهوش أى تعب او مسؤولية


لو سمحت لحد يبتذ مشاعرك .. وقتها ما تلومش غير نفســـــــــــــــــــــــــــــــــك ..
عشان مفيش حد بيعمل فيك حاجة إلا لما إنت تسمحله ..

يعنى بإرادتــــــــــــــــــــــــــــــــــك



للمدربة : أمل ذكى

المدربة أمل ذكى

المدربة أمل ذكى

الجمعة، 11 مايو 2012

زاحم المعاصى بالطاعات حتى لو كانت بسيطة ~


زاحم المعاصى بالطاعات ..

كل ابن آدم خطاء وخير الخاطئين التوابون ~

ربنا خلقنا كلنا بشر عندنا مظاهر الضعف .. كثير بنغلط ونعمل حاجات تزعل ربنا مننا ..

سواء كنا عارفين الحاجات دى أو لا  ..

بس الأهم .. إننا نكون دايما بعيد عن الغفلة .. يعنى لما نغلط نرجع على طول لربنا ..

فى ناس بتغلط وهى اصلا مش حاسة انها غلطانة .. دول ربنا خاتم على قلوبهم نعوذ بالله ان نكون منهم ..

وفى ناس تغلط وتلاقى على طول ضميرها يأنبها او تزعل من نفسها وترجع على طول لربنا .. نرجو الله ان نكون دوما منهم


وعشان كده فكرة النهارده .. اننا على طول نعمل حسنات بسيطة .. لكنها فى ميزان ربنا كبيرة جدااااااااااا .. وعشان يوم القيامة يبقى ميزان الطاعات اعلى كثير من ميزان السيئات ..

إن الحسنات يذهبن السيئات ..

مجرد أفكار جت فى بالى وحبيت اشارككم معايا بيها ..

بعيد عن العبادات والفرائض اللى المفروض نثبت عليها زى الصلاة والصوم وغيرها ..

ادعى لصديق بظهر الغيب وانت بتصلى او حتى فى موضع ذكر لله  .. دعوة الغيب مجابة .. ربنا حيكرمه وملائكته حرد عليك بالدعوات المثل ..

تصدق حتى لو كل يوم بحاجة بسيطة .. بس خلى كل نازلة ليك فى الشارع بطاعة .. وادخال سرور على قلب حد بسيط .. الجنيه وال 5 جنيه اللى متفرقش معاك تفرق اووووووووووى مع الغلبان ~
وبعدها احمد ربنا انه جعلك تدى الناس .. ومتحتاجش لهم .. ولا وقفت فى موقف الحاجة دى من البشر ( الحمد لله )


جرب تعمل حاجة لمامتك وباباك حتى لو قولتلهم بحبكم  .. اى حاجة حتى  لو بسيطة عشان تفرحهم .. وخلى نيتك ادخال السرور على قلوبهم وبر الوالدين وربنا حيعطيك اكثر مما يرضيك

جرب تتصل بصديق بقالك كثير ما كلمتوش او قريب .. مجرد ما تفرحه ربنا حيفرحك اضعاااااف ..

جرب تحب حد بجد من قلبك لله .. وخليك جنبه وساعده فى حياته .. من غير ما تستنى اى مقابل .. حتلاقى ابواب الرزق والسعادة بتتفتحلك ..

جرب تعمل حاجة لصديق كنت عارف انه نفسه فيها بس ما كنش عارف يعملها وفاجئه بالحاجة دى .. بمجرد ما تشوف سعادته حتحس برضا وأمان ..

جرب تحب كل الناس .. من غير ثمن .. من غير مصلحة .. ساعد لوجه الله .. حتلاقى ربنا بيسترها معاك .. كفاية انه حيخلى قلبك نقى وجميل وحيبعد عنك شر نفسك وشر الناس السوء ..

كلها حاجات بسيطة .. بتسعد اووووووووووووووى

يلا كل واحد النهارده يعمل حاجة او اثنين او ثلاثة من الحاجات البسيطة دى .. ويبقى يقولنا حس بإيه .. وإيه اللى فرق فى يومه وفى حياته وفى إحساسه بنفسه


لمدربة التنمية البشرية 
أمل ذكى


الجمعة، 6 أبريل 2012

اليقين بالله ~


حابة بس أقولكم حاجة ~~ حسيتها وعيشتها .. ونفسى توصلكم

كثير ربنا بيدينا نعم .. ويمكن نعمة فيهم تكون قريبة مننا جداااااااااا ~~

يبدأ ربنا يقربها لينا .. ونغوص فيها اكثر .. نحبها ونتعلق بيها اوووووى وتبقى جوانا فى دمنا وحياتنا وعقلنا .. تجتـــــــاح حياتنـــــــــــــا ..

وفجأة ربنا يوضعك فى وضع الاختيار .. بين حبك لى وبين حب النعمة اللى هو ادهالك ~~

وتلاقى نفسك عقلك وبالك وقلبك صاحيين ومستنين خطواتك ..

وتقول حختار ايه .. حبى ورضا ربنا .. ولا النعمة اللى ادهالى .. بالطريقة اللى يمكن يكون هو مش بيحبها ..


امتحان صعب !! واختيار اصعـــــــب .

والحقيقة ان حب ربنا بيحتاج اثبات .. بتعب وصبر وابتلاء ودموع ووتحمل مشقة وألم عشان تثبتله انك ثابت عشانه مش عشان حاجة تانية ~

ف الوقت ده اعمل اللى ربنا عاوزه .. واترك له نفسك .. وامورك .. واعمل الصح ..

وهو حيعمل حاجة من الاثنين .. والاثنين خير ليك ..

أما حيديك الحاجة دى بالطريقة اللى يحبها ~~ وحيسخرها تتعب عشان تدوملك ع طول


أما حتكون حاجة لا تستحققك فياخدها منك ويديك بدالها حاجة تعوضك عنها وتكون خير ليك ~~


أكيد لا أنا ولا أنتم عارفين ايه اللى ممكن يحصل .~~

بس أنا عندى يقين أنه مش حيكون الا الخير .. ( لن تنالوا ما عند الله إلا بطاعته ) ~~

اتركوا انفسكم لله .. برضا وصبــــــــــــــــــــــــر ..

حيديكم بعدها خير .. وقوة .. وفرج ... وسعــــــــــــــــادة ♥
 
 
لمدربة التنمية البشرية أمل ذكى  ♥
6-4-2012

الثلاثاء، 3 أبريل 2012

الإقتداء بصفــــــــــــــــــات الله سر النجاح فى الحياة ♥



الإقتداء بصفــــــــــــــــــات الله سر النجاح فى الحياة ♥
 



معنى المقولة :


 اننا نقتدى بصفات الله فى حاجات كثير زى الحلم زى التسامح وغيرها من الصفات الحميـــــــــــــدة 

. احنا اكيد مثلا مش حنغفر لحد ذنبوبه الدنيوية  .. ودى حاجة الناس كلها عارفاها ~~

لكن انت تقدر تقتدى بصفة انك مثلا تغفر لحد اساء ف حقك أو حد غلط فيك او آذاك ..


مثال : 

ربنا يحيى ويميت ..

اكيد احنا لا حنحى ولا حنميت شخص بالحياة والروح ..

ومع ذلك احنا ممكن بتصرفاتنا او كلماتنا .. نحى نفس ونموتها ..

يعنى مثلا .. ممكن حد يقولك كلمة تكسرك .. او حاجة تجرحك وتفضل مأثرة فى نفسك العمر كله .. ده هنا حد موت حاجة جواك وانت حى ~~

وشخص تانى يديكى كلمة تشجعك وتلهمك وتحفزك ده حيبقى احياك وحفزك واثر فى كل حياتك وكيانك ~~
 



لذلك تذكر دائمـــــــــــــــا أن :


الإقتداء بصفــــــــــــــــــات الله سر النجاح فى الحياة ♥



لمدربة التنمية البشرية : أمل ذكى ~


السبت، 17 مارس 2012


لما بننوى حاجة نعملها فى يوم فى حياتنا .. بنية خير لله .. ربنا بيكرمنا بحق نيتنا وثقتنا فيه كل الخير اللى لينا ..

لكن لما بنخاف من كل خطوة .. من الفشل او حتى من الخسارة .. عمرنا ما حنخطو خطوة فى حياتنا .. لا فى علاقة بربنا ولا مع الناس ولا حتى شغلنا ولا حياتنا العاطفية ..

كل حاجة فى حياتنا قرار مننا .. يا بنكون قدها بثقتنا فى الله وقدرتنا ونيتنا الحلوة ..

يا بنخسر كل حاجة .. بخوفنا وضعفنا ♥

ربنا يكتبلنا كلنا الخير والسعادة وراحة القلب والبال

By Trainer Aml Zaki

الأربعاء، 14 مارس 2012

رفقا بأرواحنا


احيانا تحتاج ارواحنا فترة نقاهة من الألم .. مثلها مثل نقاهة أجسدنا من المرض ..

فرفقا بأرواحنا .. ومشاعرنا ♥

By Trainer Aml zaki ^^

السبت، 10 مارس 2012

شوف إنت مين فيهم ♥

.
أنواع الناس اللى فى حياتنا


أكيد فى حياتنا كلنا ناس زى اللى حقول عليهم دول ^^

كل واحد وهو بيقرأ كلامى ده حيشوف نفسه وحيشوف مين فى حياته زى الناس دى اللى فى حياتى ..


فى ناس كده .. كل همهم سعادتك .. بيدعولك فى حضورك وغيابك .. وانت مفرحهم او وانت مزعلهم
ودول بقى اقرب الناس ليك ^_^ بيجرى حبك فى دمهم وحبهم فى دمك

دول أهلك دول زوجك او زوجتك دول حبيبك او جبيتك ^^

( دعوة صافية دلوقتى من كل واحد فينا ليهم بجد :) ربنا يديم وجودهم فى حياتنا دايما :) ويعطيهم ما يرضيهم يارب

_________________________

النوع التانى ^^  

نوع معاك دايما فى شدتك قبل فرحتك

طبعا عرفنا دول مين .. دول الأصدقاء

( شابوه منى ومنكم لكل اصدقاء عمركم اللى بجد )

ربنا يجمعنا بيهم فى الجنة زى ما جمعنا معاهم فى الدنيا  ^_^

_______________________________

النوع الثالث

نوع علمنا وكان سبب ولو بسيط فى تعلمينا خبرة ولو بسيطة

زى اساتذتنا فى المدرسة والجامعة او حتى طفل ف الشارع علمنا حاجة من موقف عمله

 تحياتنا كلنا لكل حد علمنا حرفا .. او معنى اثر فى نفوسنا

ومنى دعوة خاصة جدااااااا لدكتور ابراهيم الفقى

________________________


النوع الرابع  

نوع بيحبنا اكثر يمكن من احنا ما بنحبه او نعرفه .. والسبب إننا اثرنا فيه ..

يمكن يكون بيدعلنا فى الغيب دايما .. او حتى بيتكلم عننا حلو فى غيابنا ..

او بيرد عننا سوء ..

دول بقى زمايلنا او طلابنا او حتى ناس منعرفهمش .. بس احنا فى حياتهم نعنى الكثير

( نقدر بس نقولهم .. ربنا يجعل كل ذرة حب لينا .. أضعاف حب منه ليكم


النوع الخامس ^^


نوع بيكرهنا من غير حتى سبب .. بيحقد علينا .. او فى سره بيتمنى لنا الشر ...

بيتكلم علينا باسوء كلام .. بدون اى سبب .. مستنى لنا على غلطة ..

( النوع ده نقولهم .. شكرااا على الحسنات اللى بناخدها من كلامكم علينا ..

وشكرا اننا اخدين اهتمام وجزء من تفكيركم ^^ ده يعنى احنا مأثرين فيكم

وشكرا انكم بتحسسوا بنعمة العافية من الابتلاء اللى عندكم

وفى الاخر ربنا يهديكم :) ^_^

كل دول انواع اشخاص فى حياتنا كلنا .. دور على كل نوع .. وشوف يستحق منك ايه .. واعمله ^^ عشان كلهم يستاهلوا الخير مننا حتى المسىء

وشوف انت مين فى حياة كل حد فيهم :)



لمدربة التنمية البشرية
أمل محمد ذكى

الاثنين، 13 فبراير 2012

وَأَمَّا بِنِعْمَةِ رَبِّكَ فَحَدِّثْ ^^



مقالة النهارده دينية يارب تعجبكم بس هى خطأ فى نفسير آية اغلب الناس مننا بيقع فيه ..

او بيفهمه بمعنى آخر غير معناه الحقيقى


آية ( وَأَمَّا بِنِعْمَةِ رَبِّكَ فَحَدِّثْ ) - سورة الضحى

آية كثير جداا استوقفت عندها .. بعد ما كنت بسمع معناها من وجه نظر حد من اقرب الناس ليا فى عائلتى .. وكمان من ناس اعرفهم سواء اصدقاء او طلاب ..


( إن الإنسان يحدث الناس بالنعم اللى هو فيها ع طول سواء فى شغله او صحته او اهله او اى حاجة تخصه )

الحقيقة التفسير ده خلانى عاوزة اعرف المعنى الحقيقى للآية ..

قلت لنفسى ازاى القرآن حيتعارض مع السنة اكيد مستحيل ..

سيدنا محمد عليه أفضل الصلاة والسلام قال :

واستعينوا على قضاء حوائجكم بالكتمان ..

يعنى اننا ندارى احيانا حاجات فى حياتنا عن الناس !!

ولما بدأت اقرأ واسأل شيوخ فى تفسير الآية

فهمت معناها الحقيقة .. وهو ان الانسان يحدث نفسه هو بنعم الله عليه

عشان دايما يوصل لمعنى شكر الله وحمده على طووووووووووول

سواء كانت النعمة دى نعمة صحة او راحة بال أو اهل حواليه أو نجاح فى العمل ..

والله عزوجل بيحب انه لما ينعم على عبده نعمة  يرى أثرها عليه سواء فى  ملابسه وفي أكله وفي شربه،

فلا يظهر في مظهر الفقراء والله قد أعطاه المال ووسع عليه، لا تكون ملابسه ولا مأكله كالفقراء بل يظهر نعم الله في مأكله ومشربه وملبسه. ولكن لا يفهم من هذا الزيادة التي فيها الغلو وفيها الإسراف والتبذير.

يارب يكون معنى الآية وصلت . وياريت تنقلوا التفسير ده وتفهموا للناس ..

عشان دى آية من الآيات اللى فى القرآن الكريم اغلبنا بيتلخبط في تفسيرهاا


جزاكم الله الجنة يارب


مدربة : أمل محمد ذكى ^^

السبت، 28 يناير 2012

حسد إيه .. حقد إيه .. ده كله بأمر الله ^^



فكرة النهارده من ضمن اكثر أفكار بقابلها فى حياتى الشخصية ...

الخوف من حسد الآخرين . الخوف من حقد الناس ومكائدهم

كل يوم او اثنين الأقى حد بيقولى خدى بالك من الحسد خايفين عليكى !!

واكيد مش انا بس اللى بتحط فى الموقف ده ناس كثير منكم كمان بيحصلهم ده ..

بحكم ان بعض الناس .. حتى لو فى حياتهم مشاكل بيبنوا العكس .. او بيغطوا  الحزن والمشاكل بالسعادة والتفاؤل والأمل ..

بس اللى لاحظته انه فى ناس فعلا عندها رعب من الحسد او فوبيا – خوف مبالغ فيه .. !!!!!!!!!!!!!!!

عشان كده حبيت اقول حاجة لينا كلنا .. هى فعلا بجد او حقيقة ..

أنا مؤمنة جداا بالحسد لإنه مذكور فى كتاب الله القرآن الكريم ..

بس كمان مؤمنة إن عمر الإنسان ما حد حيضره شىء إلا بأمر الله

{قُلْ لَنْ يُصِيبَنَا إِلَّا مَا كَتَبَ اللَّهُ لَنَا هُوَ مَوْلانَا وَعَلَى اللَّهِ فَلْيَتَوَكَّلِ الْمُؤْمِنُونَ

مؤمنة إن الناس لو كلها اجتمعت على انها تضرنا عمر ما حيصبنا إلا قدر الله
قال رسول الله صلى الله عليه وسلم
:
يا غلام إني أعلمك كلمات

:

احفظ اللَّه يحفظك، احفظ اللَّه تجده تجاهك،

إذا سألت فسأل اللَّه، وإذا استعنت فاستعَنْ باللَّه،

واعلم أن الأمة لو اجتمعت عَلَى أن ينفعوك بشيء لم ينفعوك إلا بشيء قد كتبه اللَّه
لك،

وإن اجتمعوا عَلَى أن يضروك بشيء لم يضروك إلا بشيء قد كتبه اللَّه عليك،

رفعت الأقلام وجفت الصحف


يعنى خلاص أمر الله نافذ مش امر الناس .!!!

عشان كده بقول لنفسى وليكم .. استودعوا الله كل حاجة فى حياتكم .. سعادتكم .. حبكم .. شغلكم .. اهلكم .. اصحابكم .. كل شىء حتى أنفاسكم

وافتكروا دايما اعظم قصص القرآن قصة سيدنا يعقوب وسيدنا يوسف

لما سيدنا يعقوب خاف على سيدنا يوسف من انه يخسره او اخواته يضروه

خسره فعلا وفقد بصره !!
قَالَ إِنِّي لَيَحْزُنُنِي أَنْ تَذْهَبُوا بِهِ وَأَخَافُ أَنْ يَأْكُلَهُ الذِّئْبُ وَأَنْتُمْ عَنْهُ غَافِلُونَ

ولما فوض امره لله .. واستودع سيدنا يوسف وحبه لى عند الله

سيدنا يوسف رجعله وربنا ردله بصره ..
فَلَمَّا أَن جَاءَ الْبَشِيرُ أَلْقَاهُ عَلَى وَجْهِهِ فَارْتَدَّ بَصِيرًا قَالَ أَلَمْ أَقُل لَّكُمْ إِنِّي أَعْلَمُ مِنَ اللَّهِ مَا لاَ تَعْلَمُونَ 

عشان كده ياريت كلنا فعلا نفوض امرنا لله ونستودعه كل حياتنا

ونطمـــــــــــــــــــن إن بس اللى ربنا عاوزه هو اللى حيكون

بحبكم ف الله

كتاباتى /
أمل محمد ذكى