الأربعاء، 21 ديسمبر 2011

أطفال تفتقد الطفولة !!!



 10:28pm


طفولة تفتقد الطفولة !!


موضوع النهارده جديد شوية اننا نتكلم فيه .. بس اعتقد هو جوه كل واحد فينا بس حاطه فى نفسه وساكت


الطفولة ..!!!!!!!!!


كلنا دلوقتى بنتمنى لو نرجع اطفال تانى .. نلعب ونعيش واحنا مش ف بالنا اى هموم او مشاكل او تعب .. وكل ما بنكبر اكثر الامنية دى بتكبر جوانا اكثر

بس الغريب جداااا .. ان جيال الاطفال دلوقتى .. بيتفقد الطفولة .. كل طفلة بنت عاوزة تكبر نفسها باى شكل .. سواء فى اللبس وطريقة الكلام وحتى اللعب !!!!!!!


واى ولد عاوز يبقى راجل وهو عنده يدوب كام سنة .. ويرفع صوته فى اهله .. او مدرسينه وتتغير طريقة كلامه ...!!!


لدرجة ان الواحد بدأ يحس ان الشريحة دى من المجتمع انقرضت ..!!!


وبقى قدامنا سؤال واحد .. هى الطفولة راحت فين .. ولا احنا اللى كان زماننا غلط ..

الواحد فاكر وهو طفل وطريقة لعبه وتسريحاته .. وطريقة كلامه واحترامه للكبير .. واهتمامه بدراسته .. تفاصيل الحياة دى ..!! دلوقتى بقت مفقـــــــــــــــــــودة !!

اطفال دلوقتى بقى الموضوع مختلف تماما .. بنات عندهم سنوات تتعد على صوابع الايد الواحدة .. وروج وكلام عن الحب .. فاكرة موقف مش حنساه عمرى .. بنوتة اعرفها فى 3 ابتدائى ولاقتها كاتبة ع الميل ما حدش بينجرح اوى الا لو حب اوى .. الحقيقة انا مش فاكرة وقتها غير انى فضلت اكثر من 10 دقايق بضحك .. وعمالة اقول عاشت قد ايه دى عشان تقول كده !!!  


والولاد نفس الكلام ..!!

بس السؤال اللى بقى بيطرح نفسه دلوقتى ..

هى الطفولة راحت فين ... ؟؟؟
وهل المشكلة ف الاهل ؟؟ ولا فى الاطفال نفسهم .؟؟؟
ولا فى العصر التكنولوجى ده اللى احنا فيه ...!! افقدنا حتى معانى الطفولة فى الاطفال !

والاهم بقى يا ترى الجيل القادم  اللى بعد جيل الاطفال الكبار دول حيبقى ايه !! وعجبى


By : T. AmOla zaki

الجمعة، 16 ديسمبر 2011

الحمد لله على الوقت الصعب



ساعات كثير بتحصل حاجات صعبة وتمر فى حياتنا أوقات عصيبة ..

بس اجمل نتايج دايما بتبان من الوقت الصعب .. عشان بتخلينا نعرف قيمة كل حاجة فى حياتنا .. ومقدار حبنا ليها .. او استغنائناا عنها ..

بتبين مين الناس الحلوة اللى بتقف جنبا .. فنلاقى ناس كنا متوقعين وجودهم جنبا مش جنبا .. او نلاقى ناس كنت مش متوقعين وجودهم جنبنا ويبقوا هما اول ناس يهونوا علينا

فعلا الحمد لله ع كل حاجة خصوصا الاوقات العصيبة ..

عشان بتبين معادن ناس كثير فى حياتنا .. وبنعرف ساعتها مين يستحقنا ومين لا ^^

بحب كل الناس خصوصا الناس اللى بتبقى عليا وقلبى مع كل الناس اللى وجودى ف حياتهم سبب لهم ولو للحظة مشكلة ..

يارب يسعدكم جميعا وما يجعلنيش سبب فى وجع أى انسان فى الدنيا ♥
By : AmOola Zaki 



عارف يعنى إيه ربنا بيحبك ..؟؟

يعنى تبقى فى أكثر فترة فى حياتك بتتألم ..

ويبقى مخدر قلبك من الإحساس بالوجع اغلب الوقت ..

وكأنه بيطبطب عليك وبيقولك .. لا تحزن فإنى يا عبدى معك ^^

By : AmOola zaki

http://www.facebook.com/pages/Amola-zaki-fan-page/159171580844646

الأربعاء، 14 ديسمبر 2011

احلى ذكريات العمر .. ♥

احلى ذكريات العمر .. ♥


النهارده جوايا حنين اوى لكل ذكريات عمرى خصوصا وانا طفلة
..
فاكرانى بمريلة الحضانة المربعات .. فاكرة الزمزامية والشنطة الصغيرة والألوان والكرسات
فاكرة اوضة الموسيقى ولعبى ع البيانو وغنايا فى الكورال والحفلات ..
أحلى ايام من عمرنا واحنا اطفال صغيرين

شيفاكم دلوقتى وكل واحد فيكم رجع بذاكرته لورا 20 سنة او  اكثر وافتكر نفسه وشكله وضحكته زماااااااااان وافتكر بابا وماما لما كانوا ع طول ماسكين ايديه
رجعت معاكم انا كمان كام سنة لورا لأيام المدرسة والتختة الاولى والمسطرة والكتابة بالاقلام الجاف ..
والخروج فى الرحلات مع الاصحاب والضحكة الجميلة اللى كانت بتجمعنا كلنا فى صورة واحدة وكل ده دلوقتى بقى ذكريات

..
فاكرة اول حب ف المدرسة واحنا اطفال كل اللى عندنا براءة وتعبير عن كل حاجة جوانا بصدق ..
فاكرة حب المدرسين ويوم عيد الأم كان كل مدرس ومدرسة لينا مثل أعلى .. فعلا / كنا أطفال ..
كل يوم عدى وبيعدى علينا بنكبر ونلاقى كل حاجة فى حياتنا بقت ذكريات .. محفورة ف الذاكرة ما بتتنساش ..
فاكرة ايام ثانوى والمذاكرة والقلق من الامتحانات

..
فاكرة أول يوم كلية والاندهاش من الجو الجديد والعالم المفتوح .. مفحورة جوانا التعب والارتياح ..
فاكرة يوم التخرج والوصول لجزء بسيط من الامنيات ..
وشايفة معاكم دلوقتى سعادة كل ام واب وقتها كانت ازاى
..
فاكرة دموع الفرحة اللى ما بتفرقناش
..
ولسه ياما ايام جاية فى حياتنا حتبقى زى ايام زمان وحتكون فى يوم ذكريات
...
عشان كده بتمنى كلنا نعيش كل لحظة ونديها حقها فى عمرنا ونعيشها نعيشها اووووووووووووووووووى
عشان يوم ما تبقى ذكرى .. تبقى سايبة جوانا أحلى المشاعر والضحكات



^^
Love all of U
AmOola Zaki