سؤال بيطرح نفسه ودايما بيخطر ف بالى .. ليه معظم الناس مش بتحس بقيمة اى حاجة الا لو خسروها !!!
يعنى مثلا لازم حد يخسر صديق عشان يعرف ويحس قد ايه هو كان مهم عنده .. ليه مثلا لازم تخسر صحتك بالسجاير او غيره عشان تحس قد ايه هى كانت حاجة مهمة المفروض تحافظ عليها !! ليه لازم تخسر حب صادق عشان تعيش عمرك ندمان انك ضيعته بعد ما كان ف ايدك .. ليه لازم تخسر نجاح عشان تحس ان المفروض كنت تبقى احسن وانت ضيعت الفرصة !! ليه مش بتحس بقيمة اهلك او اخواتك الا لو فقدت حد منهم !!
مليوووووون ليه وليه بنسمعها من ناس كثير فى حياتنا
قصادها مليون ياريت و لو و يارب يرجع الزمن بيا لورا تانى وليه حصل كده
عارفين بوجهة نظرى ليه ؟!! يعنى ايه الاجابة
اولا : هى عدم رضا بقدر الله
ثانيا : هى اننا دايما اما عايشين فى الماضى او فى المستقبل
وما حدش فاهم ان الوقت الحاضر ده اللى نملكه ولازم نعيشه صح عشان قدام ما يبقاش ماضى ونندم تانى اننا ضيعناه
ثالثا : السلبية ايوه السلبية
ناس كثير قدام كل حاجة او فرصة .. تقول مش حقدر اوصلها .. او ده نصيبى كده .. وتجيب كل حاجة ع القدر والظروف والجواباات زى ما احنا عارفين
لكن بنظرى انا هى سلبية احيانا
كل واحد قاعد مكانه وعاوز كل حاجة تجيله ( شغلة تمام - وزوجة حلوة وبتحبه وصديق يصونه ونجاح وتميز ) كل حاجة من غير تعب
والحقيقة انه عمر ما الانسان حياخد اى حاجة الا لو تعب بجد عشان يوصلها
ياريت كلنا نكون واثقين فى ربنا الاول وفى قدراتنا ثانيا و نتعب ونعرف ان عمرنا ما حنحقق اهداف مجانا !!!
وما نيل المطالب بالتمنى ولكن تؤخد الدنيا غلابة
عشان كده لازم نكون واثقين فى ربنا وفى قدرات نفسنا ونعمل دايما اللى علينا
وبعد كده لو عملنا كل حاجة واخدنا بالاسباب والحاجة راحت يبقى هو ده القضاء والقدر
ونحمد ربنا عليه من غير ما نقف عنده ونندم ونبدأ من جديد
اتمنى تكون فكرتى ورايى وصلكم بطريقة صح
ليست هناك تعليقات:
إرسال تعليق