جزاء قوة اليقين بالله

يارب تكونوا جميعا فى احسن الاحوال .. كلنا مستعدين للعشر الاواخر عسى الله ان يبلغنا ليلة القدر ويعفو عنا جميعا يارب <3 ويفتح لنا ابواب رحمته وقربه

استوقفتنى آيات فى سورة القصص النهارده ولاقيت فيها قمة اليقين والثقة بالله واجمل جزاء كان من ربنا لأم سيدنا موسى عليه السلام

 جزاء قوة اليقين بالله <3

هكذا كانت أم سيدنا موسى فى موعد مع جزاء الله علي يقينها وثقتها به .. بعد ما اطاعت اوامر الله عزوجل

بدأت القصة بعد ولادة سيدنا موسى .. وخوف امه عليه من فرعون وانه يقتله .. بعدها يأمرها ربنا سبحانه وتعالى بإنها تلقيه فى اليم .. تخيلوا حب الام وقد ايه كانت فى انتظار طفلها ده .. اختبار من ربنا عظيم ليها .. بس هى نفذت اوامر ربنا والقته بايديها فى اليم ..


بس ده كان بسبب ثقتها فى ربنا .. انه اكيد ده الخير ليها ولطفلها <3
قمة اليقين ف الله وقضاءوه ..

وأوحينا إلى أم موسى أن أرضعيه فإذا خفت عليه فألقيه في اليم ولا تخافي ولا تحزني إنا رادوه إليك وجاعلوه من المرسلين - سورة القصص الاية 7

طيب بعد ما وثقت فى الله ام موسى .. يجى هنا اول جزاء ليها على يقنها بالله

فالتقطه آل فرعون ليكون لهم عدوا وحزنا إن فرعون وهامان وجنودهما كانوا خاطئين ( 8 ) وقالت امرأة فرعون قرة عين لي ولك لا تقتلوه عسى أن ينفعنا أو نتخذه ولدا وهم لا يشعرون (9)

يبقى ولدا فى بيت فرعون ... سبحان الله .. الشخص اللى كان هو اللى حيقتله .. هو اللى زوجته تطلب منه ان لا يقتلوه ..
فعلا سبحان من امره بين الكاف والنون !!

طيب وبعدين !! دى ام !! طبيعى بتتألم .. الطفل اللى كانت منتظرة ولادته مش معاهم .. اكيد قلبها وجعها .. وربنا اعلم حد بده سبحانه .. يديها قوة وصبر من عنده ..

وأصبح فؤاد أم موسى فارغا إن كادت لتبدي به لولا أن ربطنا على قلبها لتكون من المؤمنين ( 10 )

<3 زى ما ربنا فى حياتنا بيدنا الداء ومعاه الدواء .. سواء كان نسيان لامر فى حياتنا سبب لنا الألم او فقد لحد عزيز علينا ويصبرنا ربنا بعدها .. تقريبا الموقف مشابه ;)

بس المهم يا ترى احنا عندنا يقين وثقة بالله كده زى ام سيدنا موسى عليه السلام !!!؟؟


ده لسه كمان جاى جزاء ربنا عن يقين ام موسى عليه السلام شوفوا حيحصل ايه !

وحرمنا عليه المراضع من قبل فقالت هل أدلكم على أهل بيت يكفلونه لكم وهم له ناصحون ( 12 ) فرددناه إلى أمه كي تقر عينها ولا تحزن ولتعلم أن وعد الله حق ولكن أكثرهم لا يعلمون ( 13



ياااااه ع عطاء ربنا بجد .. يحرم عليه المراضع .. عشان يرده ويرجعه لأمه .. فتقر عينها ولا تحزن .. جزاء ثقتها بالله .. ربنا سبب الاسباب عشان يرجعلها ابنها ولولا ثقتها بالله اكيد الموضوع كان حيختلف جدااا ..

يمكن كلنا عارفين القصة دى .. بس مش كلنا اخدناها بالمعنى ده .. اليقين بالله .. القصة دى تدينا تفاؤل وامل وثقة ان الجاى فى حياة كل واحد فينا هو الخير وهو احسن من اللى راح ان شاء الله .. المهم نتوكل على الله .. ونثق فيه .. ونقوله بجد من قلبنا
حسبنا انت يارب ونعم الوكيل .. فوضوا امركم لله .. واكيد ربنا مش حيخيب ظننا فيه ابدااا ... فى حياتنا او علاقتنا او شغلنا او حتى علاقة بربنا .. نخلى عندنا يقين بالله .. نزود الثقة فيه فى قلوبنا .. نتوب واحنا على ثقة انه حيقبلنا وانه اعظم من اى شىء .. نشتغل ونتعب واحنا على يقين انه حينجحنا وحيوفقنا .. نحب ونعمل الخير واحنا على ثقة انه حيحفظنا وحيكأفئنا .. نتصدق بأموالنا او كلماتنا واحنا على ثقة انها حترجعلنا اضعاف ما اديناها ..


يارب تكون الفكرة وصلتلكم والمقالة ادتلكم أمل فى الحياة اكثر .. وطبعا احنا فى ايام جميلة كافية اننا يبقى عندنا يقين بالله


ربنا يعطيكم ما يرضيكم ..
AmOla zaki