سعادة القلب

سعادة القلب :

يارب تكونوا جميعا بأحسن حال
النهارده كتبت حاجة بفضل الله وبردوا فى نفس الميعاد بعد صلاة الفجر
ومعايا سر حلو اوى لسعادتكم ... اكيد كلكم زيى نفسكم تبقوا سعداء <3
كل واحد مننا دلوقتى يمكن يكون جواه حاجة تعباه الله اعلم بيها من الناس .. حزن او ألم او اى مشكلة من مشاكل حياتنا اليومية
قعدت افكر فى حلول لأى صدمات بتقابلنا .. ناس كثير وانا معاهم بيقولوا سر السعادة دايما فى القرب من الله .. وفى ناس شايفة ده فى الصحاب وناس حتقول فى الشغل وناس حتقول النجاح وناس حتقول ........واسباب كثير كل مجموعة من الناس شيفاها اسباب اننا نمر من لحظات ضعفنا وانكسارنا بسرعة .

بس فى حاجة مهمة اوى يمكن تكون ع بال حد دلوقتى منكم . ويمكن تكون عمرها ما جت ع بال بعض الناس .. ويمكن يكون فى ناس عملوها وندموا انهم عملوها ..
الحاجة دى هى ادخال الفرحة على قلوب ناس غيرنا <3
قد إيه إننا نسعد انسان او نكون سبب فى تهوين كرب عليه دى حاجة رائعــــــة
ناس كثير من مجتمعنا اعتقد ندمانين على الطيبة وزى ما بنشوف ع النت كمية الكلام على ان الناس ما تستاهلش وان الطيبة سذاجة وغيرها من الكلمات دى ..

بس سؤالى هنا اللى حابة كل واحد فينا يسأله لنفسه :
هو احنا لما كنا بنعمل الخير وبيترد شر او اساءة كنا بنعمله ليه ؟؟؟؟؟؟؟؟؟؟؟
يا ترى كنا فعلا مستنين شكر ...!!
ولا مستنين مصلحة قصاده ..!!!
ولا مستنين يتشاور علينا ويتقال ده عمل كذا ..!!
ولا .. ولا .... واسباب كثير غيرها ..

فى مثل مصرى شهير : بيقول اعمل الخير وارميه فى البحر
المثل ده تفسيره من وجهة نظرى المتواضعة . ان الخير اللى اترمى فى البحر هو الُطعم اللى بيه الخير كله بيطلعلنا فى السنارة او الشبكة وده مش بيكون بإرادة اشخاص بس ده بإرادة الله اللى فوق كل إرادة

-    لازم نفرح اننا بنعمل خير حتى لو اتقابل بإساءة ..
عشان ربنا عمره ما بيضيع حد بيساعد الناس او بيفرحهم
أقولكم على سر السعادة ..

جربوا من النهارده كل يوم تعملوا حاجة او اثنين يسعدوا الآخرين حتى لو كانت الحاجات دى قمة فى البساطة <3

اسعد طفل لو شفته فى شارع واديله حاجة حلوة
( حاجة بسيطة اووى عندك بس حتفرق اوى معاه )

كلم حد حزين – او عنده مشكلة وهون عليه تعبه بكلام يديله أمل او يهون عليه ألمه .. حتى ولو برسالة
حتبقى بردوا حاجة بسيطة عندك بس حتفرق اوى معاه

•    تصدق وانت فى الشارع ع حد فقير – او روح زور مريض – اعمل مفأجاة لحد من اصحابك تسعده – جيب هدية لحد عزيز عليك وليكن حد من أهلك – روح يوم زور الايتام مش بس فى يوم اليتيم او حتى ادعى لحد فى صلاتك بظهر الغيب ...... حتلاقوا حاجات اوى زى دى بسيطة فعلا وكبيــــــــرة اوى مقاما 
لا محتاجة وقت كبير ولا فلوس كثير ولا مجهود عظيم .
محتاجة حاجة واحدة بس :
قلب <3  بيحب الآخرين .. كل مهمته اسعاد ورسم البسمة ع شفايف الخلق اجمعين ..

ودلوقتى بقى لكم ان تتخيلوا ..
عطاء الله قصاد عطاءنا احنا للناس
تعتقدوا فى مقارنة ....؟؟؟؟ تعتقدوا يحق لينا نندم على الخير والطيبة !!!!

وحابة اختم كلامى بمرجعين شريعة الله فى الكون : كتاب الله وسنة رسوله :

مَن ذَا الَّذِي يُقْرِضُ اللَّهَ قَرْضًا حَسَنًا فَيُضَاعِفَهُ لَهُ وَلَهُ أَجْرٌ كَرِيمٌ -سورة الحديد: 11

وقول سيدنا محمد عليه افضل الصلاة والسلام :
من ادخل على اهل بيت من المسلمين سرورا لم يرض الله له ثوابا دون الجنه